Suraxanı rayonu ərazisində, Hövsan qəsəbəsinin yaxınlığında inşa olunan Hövsan Yaşayış Kompleksi Bakının sürətlə inkişaf edən şərq hissəsində, Xəzər sahilindən 2 kilometr məsafədə, yaşayış və istirahət üçün olduqca rahat bir məkanda yerləşir. Kompleksin 20 hektar ərazisinin qərb hissəsində şam və zeytun ağaclarından ibarət geniş yaşıllıq zonası mövcuddur. Yaşayış kompleksi yeddimərtəbəli və onmərtəbəli olmaqla 11 binadan ibarətdir. Bu binalarda ümumilikdə 2 962 mənzil var. Onlardan 280-i birotaqlı, 1 401-i ikiotaqlı, 980-i üçotaqlı, 301-i dördotaqlıdır. Birotaqlı mənzillərin sahəsi 37,30 – 38,70 m², ikiotaqlı mənzillərin sahəsi 49,22 – 67,39 m², üçotaqlı mənzillərin sahəsi 68,13 – 95,02 m², dördotaqlı mənzillərin sahəsi 78,67 –106,18 m² təşkil edir.